រឿង​ចង​ចាំ​ក្នុង​ជីវិត​បំផុត​​​របស់​ ខុន ស៊ីចាន់ ​​​ពេល​ប្រឡូក​​លើ​សង្វៀន​ក្បាច់​​គុន​ចម្រុះ​​ និង ​សង្វៀន ONE ​ ​

កីឡាករ​ ខុន ស៊ីចាន់ ​ដែល​ចាប់​ផ្ដើម​​ប្រឡូក​​លើ​សង្វៀន​​គុន​ចម្រុះ​​កាល​ឆ្នាំ​ ២០១៣​ មក​នោះ​​បង្ហើប​អំពី​រឿង​​ល្អៗ និង ​ចំណុច​​​​មិន​អាច​បំភ្លេច​បាន​មួយ​​ចំនួន​ ដូច​ជា​ការ​ប្រកួត​ដែល​ចង់​ចាំ​ក្នុង​ជីវិត​បំផុត​ ​ការ​បាន​ទៅ​ប្រកួត​នៅ​ក្រៅ​ប្រទេស​មិន​នឹក​ស្មាន​ដល់​ ​និង ​មាន​មនុស្ស​សំខាន់ៗ​ជួយ​រូប​គេ​ជា​ដើម។

​​ខុន ស៊ីចាន់ ​រំលឹក​បែប​នេះ ៖«​អារម្មណ៍​​ខ្ញុំ​ចង​ចាំ​មិន​ភ្លេច​បាន​​ គឺ​ ​​ឈ្នះ​​ខ្សែ​ក្រវាត់ ​Khmer Warriors Challenge ​លើក​ដំបូង​នៅ​កម្ពុជា​​ឆ្នាំ​ ២០១៣​ក្នុង​ទម្ងន់​ ៥៧ ​គីឡូក្រាម​។ ​​វា​ជា​អនុស្សាវរីយ៍​ល្អ​ព្រោះ​​កីឡាករ​ហាត់​ជុំ​គ្នា​​ច្រើន។ ​ជា​ពិសេស​​ខ្ញុំ​​មិន​បំភ្លេច​គុណ​​សព​លោក​ពូ​ ម៉ា សេរី​ និង​គ្រូ ឡោ វុទ្ធី ​គ្រូ​ខ្ញុំ​ ​ដែល​បាន​​រៀប​ចំ​​ និង ​ផ្គត់ផ្គង់​ឲ្យ​ខ្ញុំ​មាន​មុខ​មាន​មាត់​ក្នុង​ក្បាច់​គុន​ចម្រុះ»។

បើ​ងាក​មក​ឆាក​អន្តរជាតិ​​ប្រចាំ​សង្វៀន​ ONE ​វិញ​​កីឡាករ​ជើង​ចាស់​​ដដែល​នេះ​បញ្ជាក់​អំពី​ចំណុច​​ដែល​​នៅ​ដិត​​ដាន​អារម្មណ៍​ដូច្នេះ៖«​​​​ខ្ញុំ​មិន​នឹក​ស្មាន​​​ថា​ បាន​ទៅ​ប្រកួត​នៅ​ក្រៅ​ប្រទេស​លើ​សង្វៀន​​ ONE។ ​ខ្ញុំ​បាន​ទៅ​ ម៉ាឡេស៊ី​ ​សិង្ហបុរី និង​បាន​​ដើរ​លេង​​​​​ទីកន្លែង​កម្សាន្ត​មួយ​ចំនួន​ទៀត​ផង។ ​ អរគុណ​ ONE និង គ្រូ​ Alan Mccune ដែល​តែង​តែ​ជួយ​ជ្រោមជ្រែង​​នា​​ពេល​កន្លង​មក»។

អ្នក​លេង​​គុន​​ចម្រុះ​​​​រូប​នេះ​សង្កត់​​ធ្ងន់​​ទៀត​ថា ៖«​ខ្ញុំ​ចាំ​មិន​ភ្លេច​មួយ​ទៀត​ គឺ​ប្រកួត​នៅ​សិង្ហបុរី​​កាល​ខែ កុម្ភៈ​ ពេល​ចាញ់​ ​កីឡាករ​​ឥណ្ឌូណេស៊ី Rudy។ ​ខ្ញុំ​ស្ដាយ​ណាស់។ បច្ចេកទេស​​ខ្ញុំ​ និង គេ​មិន​លើស​ខ្វះ​គ្នា​ទេ ​ប៉ុន្តែ​ ខ្ញុំ​ភ្លាត់ និង ភ្លេច​ខ្លួន​បន្តិច​​ធ្វើ​ឲ្យ​ចូល​ឃ្លេ​គេ​តែ​ម្ដង»។ ​


ក្រៅ​ពី​សង្វៀន​ក្នុង​ស្រុក​ដែល​រៀប​ចំ​ដោយ​ ស៊ីធីអិន និង MyTV ​​ ខុន ស៊ីចាន់ ​​ចាញ់​ Rudy Agustian ​ត្រឹម​ទឹក​ទី១​ បន្ទាប់​ពី​ឈ្នះ​ Riski Umar ដោយ​ពិន្ទុ​​នៅ​ឆ្នាំ​ ២០១៨ នៅ​​ម៉ាឡេស៊ី។​ ​​​ស៊ីចាន់ ​ឈ្នះ​​ចាញ់​ការ​ប្រកួត​ដំបូង​​នៅ​សង្វៀន​អន្តរជាតិ ONE ​ដោយ​ថ្វី​​ដៃ​ មិត្ត​រួម​ជាតិ​ សឹម ប៊ុនស្រ៊ន់​ ​កាល​ឆ្នាំ​ ២០១៥​ នៅ​កម្ពុជា។​

គួរ​ដឹង​ដែរ​ថា​ ​ខុន ស៊ីចាន់ ​ ​ដែល​មាន​វ័យ​ ៣១ ឆ្នាំ​នា​ពេល​បច្ចុប្បន្ន​ ​​បាន​ផ្ដើម​អាជីព​ហ្វឹកហាត់​ប្រដាល់​គុន​ខ្មែរ​នៅ​ កង​ពល​ធំ​​អន្តរាគមន៍​ខេត្ត​ព្រះវិហារ​ ​ដោយ​មាន​គ្រូ​បង្វឹក​ លោក ឡោ វុទ្ធី។ ​​បន្ទាប់​មក​រូប​គេ​បាន ​ចូល​ខ្លួន​ប្រមូល​ផ្ដុំ​ហ្វឹកហាត់​​ក្បាច់​គុន​ចម្រុះ​ ប្រកួត​ជើង​​​ឯក Khmer Warriors Challenge ​ដែល​​រៀប​​ចំ​ឡើង​ដោយ​ ស៊ីធីអិន និង MyTV ​នៅ​ឆ្នាំ​ ២០១៣ និង​បាន​រៀន​ក្បាច់​គុន​​​ជា​ច្រើន​ដូច​ជា ​យូដូ ​តេក្វាន់ដូ និង គុន​ខ្មែរ​ជា​ដើម។​ ស៊ីចាន់ ​ឈ្នះ​ខ្សែ​​ក្រវាត់​ ឬ ​​​ជើង​​​ឯក Khmer Warriors Challenge ជា​លើក​ដំបូង​ក្នុង​ព្រឹត្តិការណ៍​មិន​​ធ្លាប់​មាន​ និង​ ការ​ប្រមូល​ផ្ដុំ​ប្រកួត​គុន​ចម្រុះ​លើក​ដំបូង​នេះ​នៅ​កម្ពុជា​មុន​រំសាយ​ទៅ​វិញ។ ​​កីឡាករ​មក​ពី​ក្លឹប​​ Phnom Penh MMA ​រូប​នេះ​​ ​បាន​ចូល​ប្រឡូក​ក្នុង​វិស័យ​គុន​ចម្រុះ​​ចំនួន​ ៦ ​ដង​ក្នុង​នោះ ​ឈ្នះ​ ៣ ដង​ និង ចាញ់​ ៣ ដង។ ​​នៅ​លើ​សង្វៀន​ ONE ​​កូន​សិស្ស​របស់​លោក ឡោ វុទ្ធី ​ឡើង​ប្រកួត​នៅ​សង្វៀន​​អន្តរជាតិ​​នេះ​​បាន​ចំនួន​ ៣ ​លើក​ ដែល​ក្នុង​នោះ​ឈ្នះ​១ ​លើក ​និង ចាញ់៕

​​​​​អត្ថបទ៖ ស៊ីធី ​

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s