សុខ ធី ​នៅ​តែ​ទទួល​បាន​ការ​ចាប់​គូ​​​ប្រកួត​កម្រិត​អន្តរជាតិ

កីឡាករ​​​ប្រដាល់​លំដាប់​ជួរ​មុខ​នៅ​​កម្ពុជា​ ​សុខ ធី ​ហៅ​ កាកា​ ​នៅ​តែ​​​​ត្រូវ​បាន​ផ្គូផ្គង​​ឲ្យ​ប្រកួត​នៅ​ក្រៅ​ប្រទេស​ជា​ពិសេស​ប្រកួត​​លើ​​​សង្វៀន​កម្រិត​ពិភព​លោក​ ​One Championship។​ ​នេះ​ជា​ការ​បង្ហើប​របស់​លោក​ ហ៊ុន ច័ន្ទរាជ្យ​ គ្រូ​បង្វឹក​​​ប្រចាំ​ក្លិប​ Cambodian Top Team បន្ទាប់​ពី​​កីឡាករ​រូប​នេះ​ប្រាប់​ថា​​​​​ ឈប់​​វ៉ៃ​នៅ​សង្វៀន​ស្រុក​ខ្មែរ​ក៏​ដោយ។ ​ពាក្យ​ពេចន៍​របស់​ សុខ ធី​​ លេច​ឮ​ បន្ទាប់​​ពី​សហព័ន្ធ​កីឡា​ប្រដាល់​គុន​ខ្មែរ​ ​​​ពិន័យ​​រូប​គេ​​មិន​ឲ្យ​​ឡើង​ប្រកួត​លើ​​សង្វៀន​ក្នុង​ស្រុក​ និង អន្តរជាតិ​​រយៈ​ពេល​​ ៦ ​ខែ​កាល​ចុង​ខែ​ ​ឆ្នាំ​ ២០១៨។

​លោក​ ​ហ៊ុន ច័ន្ទរាជ្យ ​​​បាន​គូស​បញ្ជាក់​ថា​ ៖«​​​មិន​អី​ទេ​ សុខ ធី ​​នៅ​វ៉ៃ​បាន​លើ​ឆាក​អន្តរជាតិ​ ​ហើយ​គេ​ជា​កីឡាករ​ប្រចាំ​នៅ​ One Championship ដែរ។ ​​​​​ផុត​បម្រាម​ គឺ​ឡើង​វ៉ៃ​បាន​ហើយ។ ​ការ​ពិន័យ​របស់​​ សហព័ន្ធ​កីឡា​ប្រដាល់​គុន​ខ្មែរ​​មិន​ខុស​ទេ​ ព្រោះ​​បើ​​យើង​​ឈប់​វ៉ៃ​ និង ​ដក​ខ្លួន​​ចេញ​ពី​ការ​ប្រកួត​ដែល​មាន​​ចុះ​កុង​ត្រា​ គឺ​ ខូច​កម្មវិធី​គេ​ពេល​ប្រកួត​​វគ្គ​ជម្រុះ​​នៅ​សង្វៀន​ ស៊ីអិនស៊ី។ យ៉ាង​ណា​ក្ដី​យើង​មាន​ទំនាក់​ទំនង​​ទៅ​ប្រកួត​ក្រៅ​ប្រទេស​សម្រាប់​ សុខ ធី ​ដដែល។»

លើស​ពី​នេះ​ទៅ​​ទៀត​ ​អគ្គលេខាធិការ​សហព័ន្ធ​កីឡា​​យុទ្ធ​គុន​ចម្រុះ​កម្ពុជា​​​ដដែល​​​សង្កត់​ធ្ងន់​​ថា​ ​សហព័ន្ធ​មាន​ទំនាក់ទំនង​​ជា​ហូរហែ​ទៅ​​ដៃ​គូ​​​នៅ​ក្រៅ​ប្រទេស​​​សម្រាប់​​​កីឡាករ​ទាំង​អស់​ទៅ​ប្រកួត​​មិន​​មែន​តែ​ កាកា ​​​​មួយ​នោះ​ទេ​​ហើយ​កីឡាករ​​ល្អ​ៗ​ប្រចាំ​នៅ​ព្រះរាជាណា​ចក្រ​កម្ពុជា​នឹង​ទទួល​បាន​ឱកាស​ទៅ​ប្រកួត​លំដាប់​អន្តរជាតិ​ដូច​គ្នា។ ​​កីឡាករ​វ័យ​ ២២ ​ឆ្នាំ​រូប​នេះ​នៅ​តែ​ចេញ​​ចូល​ហ្វឹកហាត់​នៅ​ក្លិប​ Cambodian Top Team ​​និង​ពេល​ខ្លះ​ទៅ​ហាត់​នៅ​ក្លិប​​ប្រទេស​ថៃ​ ដើម្បី​ត្រៀម​ប្រកួត​កម្រិត​អន្តរជាតិ​នានា។​

កាកា​ដែល​មាន​ស្រុក​កំណើត​នៅ​ខេត្ត​បន្ទាយ​មាន​ជ័យ​ ជា​កីឡាករ​ប្រដាល់​ដ៏​លេច​ធ្លោ​ម្នាក់​នៅ​ក្នុង​ស្រុក​​ និង​​លើ​ឆាក​អន្តរជាតិ​​ តាម​រយៈ​ការ​ចាប់​ទៅ​​​វ៉ៃ​​នៅ​ប្រទេស​​លើ​សង្វៀន​ល្បីៗ ​ដូច​ជា​ ប៉ុស្តិ៍ ៧ ​និង​ ប៉ុស្តិ៍ លេខ​៨​ថៃ​ជា​​ដើម។

កាកា ​​ឡើង​ប្រកួត​លើ​​សង្វៀន​កម្រិត​អន្តរជាតិ​ One Championship ​បាន​ចំនួន​ ២ ​​ដង​។ ​ការ​ប្រកួត​លើក​​ទី១​ កាកា​ ​ចាញ់​​ជើង​ខ្លាំង​​កីឡាករ​​ថៃ​ Leardsila ​​ដោយ​ពិន្ទុ កាល​ពាក់​កណ្ដាល​​ឆ្នាំ​ ២០១៨។ ​ក្រោយ​មក​​ទៀត​​ ​សង្វៀន​ដដែល​​នេះ​​ចាប់​គូ​ឲ្យ​​មាន​ការ​ប្រកួត​សង​សឹក​ ប៉ុន្តែ​ កាកា ​នៅ​តែ​ចាញ់​ពិន្ទុ ​លើ​កីឡាករ​​ថៃ​ដដែល​​ ក្នុង​ជំនួប​សង​សឹក​កាល​ចុង​ឆ្នាំ​ ២០១៨។ គួរ​រំលឹក​ថា​ ​កាល​ខែ មេសា ឆ្នាំ​ ​២០១៨​ កាកា ជា​​ម្ចាស់​ជើងឯក​​គុន​ខ្មែរ​​គូបូតា​ប្រចាំ​សង្វៀន​ប៉ុស្តិ៍​​បាយ័ន​ ​បន្ទាប់​ពី​ឈ្នះ ​ពិន្ទុ​ ឡុង ជិន៕

អត្ថបទ៖ ស៊ីធី

Leave a Reply